Алматыда Қытай Халық Республикасының 77 жылдығына арналған салтанатты қабылдау өтті

Алматыда Қытай Халық Республикасының құрылғанына 77 жыл толуына орай салтанатты қабылдау өтті. Мерекелік шараға дипломатиялық корпус өкілдері, мемлекеттік органдардың басшылары, қоғам және бизнес өкілдері, сондай-ақ Қазақстан мен Қытай арасындағы байланыстарды дамытуға үлес қосып жүрген қазақстандық және қытайлық достар қатысты.

Іс-шараны Қытай Халық Республикасының Алматыдағы Бас консулдығы ұйымдастырды. Қонақтарға арнаған сөзінде ҚХР Алматыдағы Бас консулы Су Фанцю Қазақстан мен Қытай арасындағы қарым-қатынастардың өзара сенім, құрмет пен достық негізінде қарқынды дамып келе жатқанын атап өтті.

«Бүгін біз Қытай Халық Республикасының құрылғанына 77 жыл толуын атап өту үшін жиналып отырмыз. Өзара сенім, құрмет және достықтың арқасында біздің қарым-қатынастарымыз бүгінде қарқынды дамып, жаңа мазмұнмен толығуда», – деді Бас консул.

Оның айтуынша, Қытай соңғы онжылдықтарда экономикалық және әлеуметтік даму бағытында айтарлықтай жетістіктерге қол жеткізді. Елде жасанды интеллект, жаңа энергетика, жоғары технологиялық өндіріс, цифрлық экономика және биомедицина секілді жаңа салалар қарқынды дамып келеді.

Бас консул Қытай экономикасының тұрақты өсімін де атап өтті. 2026 жылдың бірінші жартыжылдығында Қытайдың жалпы ішкі өнімі өткен жылдың сәйкес кезеңімен салыстырғанда 4,7 пайызға өскен.

Сөз барысында Қытайдың халықаралық ынтымақтастыққа қатысты ұстанымы да айтылды. Су Фанцю Қытайдың бейбіт даму жолын ұстанатынын, ашықтық пен өзара тиімді серіктестікті қолдайтынын атап өтті.

Салтанатты қабылдауда Қазақстан мен Қытай арасындағы стратегиялық серіктестіктің қазіргі жағдайына да ерекше назар аударылды.

Бас консулдың айтуынша, екі ел арасындағы қарым-қатынастар «мәңгілік жан-жақты стратегиялық серіктестік» деңгейіне көтеріліп, тату көршілік, өзара қолдау және ортақ табысқа негізделген ынтымақтастықтың үлгісіне айналып келеді.

Бүгінде Қытай Қазақстанның ірі сауда серіктестерінің бірі ғана емес, инвестиция тарту бағытындағы маңызды әріптес саналады. Екі ел арасында көлік және логистика, жасыл энергетика, жоғары технологиялық өндіріс, ауыл шаруашылығы және басқа да салаларда бірқатар бірлескен жобалар жүзеге асырылуда.

Қазақстан мен Қытай арасындағы байланыстардың нақты нәтижелері күнделікті өмірден де көрініс табуда. Қазақстан жолдарында қытайлық автомобильдер көбейіп, екі елдің тауарлары нарыққа кеңінен шығуда. Қытай–Еуропа бағытындағы жүк пойыздары Қазақстан аумағы арқылы өтіп, Азия мен Еуропа нарықтарын байланыстыратын көлік дәліздерінің маңызын арттырып келеді.

Сонымен қатар халықтар арасындағы байланыс та жанданып отыр. Қытай мен Қазақстан азаматтары екі елге саяхаттап, тарихи Жібек жолының бойындағы ортақ мұраны жаңаша танып келеді.

Алматы облысының әкімі Чингис Аринов Қытай Халық Республикасының 77 жылдығымен Қытай халқын құттықтады:

«Қазақстан мен Қытайды ерекше сенім, тату көршілік және өзара құрмет қатынастары байланыстырады. Мемлекет басшылары – Қазақстан Президенті Қасым-Жомарт Кемелұлы Тоқаев пен Қытай Халық Республикасының Төрағасы Си Цзиньпиннің саяси ерік-жігері мен жеке назар аударуының арқасында стратегиялық серіктестігіміз дәйекті түрде нығайып келеді»

Чингис Аринов Алматы облысы үшін Қытаймен ынтымақтастықтың ерекше маңызға ие екенін атап өтті. Оның айтуынша, өңірді Қытаймен тек көршілік қарым-қатынас қана емес, ортақ экономикалық мүдделер, іскерлік және мәдени байланыстар да жақындастырады.

Әкім ҚХР Алматыдағы Бас консулы Су Фанцюға Алматы облысына көрсетіп отырған назары, өңірлер арасындағы байланыстарды нығайтуға қосып отырған үлесі және өзінің облыс әкімі қызметіне тағайындалуына байланысты білдірген жылы лебізі үшін алғыс айтты.

«Алматы облысы Қытайдың өңірлері және іскерлік топтарымен байланыстарды одан әрі кеңейтуге ашық. Алдымызда жаңа бірлескен жобалар мен мүмкіндіктер бар екеніне сенімдімін», – деді ол.

Қытайдың Алматыдағы Бас консулы алдағы кезеңді Қазақстан–Қытай қарым-қатынастарын одан әрі тереңдетудің жаңа мүмкіндіктері ретінде бағалады.

Биыл Қытай үшін 15-бесжылдық даму кезеңінің басталуымен, ал Қазақстан үшін тәуелсіздіктің 35 жылдығымен ерекшеленеді. Екі мемлекет те ұлттық даму мен жаңғырудың маңызды кезеңінен өтіп отыр.

Бас консул Қазақстан мен Қытайдың даму стратегияларында өзара үндестік бар екенін атап өтіп, экономикалардың бірін-бірі толықтыратын артықшылықтары екіжақты ынтымақтастық үшін жаңа мүмкіндіктер қалыптастырып отырғанын айтты.

«Қытай тарапы Қазақстанмен бірге стратегиялық серіктестікті одан әрі нығайтып, Қытай–Қазақстан қарым-қатынастарының жаңа “алтын отызжылдығын” бірлесіп құруға дайын», – деді Су Фанцю.

Қабылдау соңында Қытай мен Қазақстан арасындағы мәңгілік достықты, өзара тиімді ынтымақтастықты және екі халықтың игілігі жолындағы серіктестікті одан әрі дамытуға ізгі тілектер айтылды.