Жүсіп Баласағұн атындағы Қырғыз ұлттық университеті жанындағы Түркі мұрасы орталығының жаңа тұжырымдамасы мен стратегиялық ынтымақтастық мәселелері талқыланды

2026 жылғы 19 қазанда Түркі мәдениеті және мұрасы қорының президенті, профессор Ақтоты Райымқұлованың Қырғыз Республикасына жұмыс сапары аясында Жүсіп Баласағұн атындағы Қырғыз ұлттық университетінің ректоры Догдурбек Чонтоевпен кездесуі өтті.

Кездесу барысында Қор мен Университет арасындағы стратегиялық ынтымақтастықтың басым бағыттары, сондай-ақ бірлескен ғылыми-мәдени бастамалар мен жобаларды іске асыру перспективалары жан-жақты талқыланды.

Сапар аясында профессор Ақтоты Райымқұлова Университет жанында жұмыс істейтін Түркі мұрасы орталығын дамытудың жаңа тұжырымдамасымен танысты. Орталықтың алдағы қызметіне қатысты жоспарларға, сондай-ақ оның ғылыми-зерттеу әлеуетін нығайтуға, түркі халықтарының ортақ мәдени мұрасын ғылыми тұрғыдан зерделеуге және кеңінен насихаттауға бағытталған шараларға жоғары баға берілді.

Кездесу қорытындысы бойынша Университет басшылығына бірлескен бастамаларды іске асыруға жан-жақты қолдау көрсетіп, жемісті ынтымақтастыққа қолайлы жағдай жасағаны үшін зор алғыс білдірілді. Тараптар серіктестік қатынастардың одан әрі тереңдеп, кеңейе түсетініне сенім білдірді.