Тәжікстанның Индустрия және жаңа технологиялар министрлігі отандық ІТ өнімдерге қызығушылық танытты

Биыл 26 тамызда Мемлекет Басшысы Қасым-Жомарт Тоқаев Қазақстанға мемлекеттік сапармен келген Тәжікстан Президенті Эмомали Рахмонмен бірқатар кездесулер өткізді. Ездесулер аясында Қазақстан мен Тәжікстан президенттері отандық IT-шешімдермен танысу үшін Цифрлық үкімет кеңсесіне барды.

Қазақстан Республикасының Цифрлық даму, инновациялар және аэроғарыш өнеркәсібі министрі Б. Мусин екі ел президентіне үкіметке азаматтармен өзара тиімді іс-қимыл орнатуға көмектесетін платформаларды таныстырды.

Кездесу барысында құжаттарды тапсыру, салықтарды төлеу және өтінімнің мәртебесін қадағалау бойынша проактивті сұрау салудың сәтті жүзеге асырылған мысалдары ұсынылды, сондай-ақ өмірдің барлық кезеңінде азаматтар мен бизнеске қызмет көрсетуге қолайлы мемлекеттік сервистер таныстырылды.

Мемлекет басшылары бала туу жөніндегі проактивті қызметтермен, сондай-ақ «Кезекке тұру және балабақшаға қабылдау», «Колледждер мен жоғары оқу орындарына түсу» сияқты түрлі өмірлік жағдайлар аясындағы қызметтермен танысты. Азаматтарға арналған проактивті қызметтер мемлекеттік қызметтерді цифрлық трансформациялау шеңберіндегі «клиентке ыңғайлы болу» қағидасына негізделген. Екі елдің басшыларына азаматтардың өтінім беруіне арналған е-Otinish платформасы және жер қойнауын пайдаланушы субъектілердің қызметіндегі ашықтықты қамтамасыз етуге, сондай-ақ пайдаланылмайтын ауыл шаруашылығы жерлерін анықтауға мүмкіндік беретін ғарыштан мониторинг жүргізу жүйесі таныстырылды.

Бұл ретте, Цифрлық даму министрі Б. Мусин мемлекет басшыларын «Цифрлық отбасы картасы» жобасының жүзеге асырылу барысы туралы хабардар етті. Бұл жоба — орталық мемлекеттік органдардың 20 деректер базасындағы әлеуметтік әл-ауқаттың 80 көрсеткішінен тұратын отбасылар туралы эталондық база. Мәліметтер базасы барлық отбасыларды әл-ауқаттың 5 деңгейі бойынша жіктеуге және проактивті форматта атаулы әлеуметтік көмекті, сондай-ақ қиын өмірлік жағдайда қалған отбасыларға мемлекеттік қолдаудың басқа да шараларын көрсетуге көмектеседі.

Бизнеске қызмет көрсету жобасы аясында «тәуекелдерді басқару жүйесі» көрсетілді, ол мемлекеттік органдарға бизнес-есептерді ұсыну кезінде қағаз түріндегі деректерді алмасуды және бюрократиялық процестерді тексеру кестесін қалыптастыру кезінде адами факторды және тиісінше сыбайлас жемқорлық тәуекелдерін жоюға көмектесті. Сондай-ақ, Тәжікстаннан келген делегация өкілдеріне жылжымайтын мүлікті тіркеу, автокөлікті қайта тіркеу, мемлекеттік нөмірлерді таңдау және сатып алу процесі онлайн түрінде көрсетілді.

Кездесу нәтижесінде Өзара түсіністік туралы меморандумға қол қойылды. Құжат аясында Қазақстан Республикасының Цифрлық даму, инновациялар және аэроғарыш өнеркәсібі министрлігі Тәжікстан Республикасының Өнеркәсіп және жаңа технологиялар министрлігімен электрондық үкімет платформасына қатысты технологияларымен және білімімен бөліседі.

Еске сала кетейік, бұған дейін 2023 жылдың 22-24 тамызы аралығында Қазақстан Республикасының Цифрлық даму, инновациялар және аэроғарыш өнеркәсібі министрі Б. Мусин бастаған техникалық топтың бағалау миссиясы Тәжік Республикасы үкіметінің аппаратымен бірқатар кездесу өткізген еді. Алдын ала бағалау миссиясын өткізу цифрландыру мен электрондық үкіметті дамыту саласындағы белгіленген келісімдерді одан әрі бекітуге мүмкіндік берді.

Қазақстан мен Тәжікстанның цифрландыру мен электронды үкіметті дамыту саласындағы ынтымақтастығы мемлекеттік қызметтерді жақсарту, экономиканы дамыту және азаматтардың сапалы өмірін қамтамасыз ету үшін цифрлық технологияларды айтарлықтай тиімді пайдалануға жол ашады. Бұл кейс отандық IT өнімдердің шетелде сұранысқа ие болғанының көрнекі мысалы. Қазақстандық ІТ-мамандар мен цифрландырушылар электронды үкіметті құру бойынша тәжірибе алмаса отырып, IT-шешімдерді елден тыс жерде енгізуде білімдері мен құзыреттерін арттырып, сол арқылы отандық өнімді экспорттауда.