Абай облысының оқушысы Жапонияда өткен халықаралық SAKURA SCIENCE 2024 бағдарламасына қатысты

Қазақстаннан бес оқушы Жапонияның Ғылым және технологиялар агенттігі (JST) ұйымдастырған беделді SAKURA SCIENCE бағдарламасына қатысуға шақырылды. Абай облысындағы дарынды балаларға арналған «БІЛІМ-ИННОВАЦИЯ» лицейінің 10-сынып оқушысы Алем Аменов Бағдарлама қатысушысы болды.  Оқуға әлемнің түкпір-түкпірінен шамамен 100 оқушы жиналды.

SAKURA SCIENCE бағдарламасының негізгі мақсаты – жастардың интеллектуалдық көкжиегін кеңейту және ғылыми ізденістерге ынталандыру. Бағдарламаға қатысушылар Жапонияның алдыңғы қатарлы ғылыми және білім беру мекемелерін аралап, елдің озық технологиялары және мәдениетімен танысты.

Алемнің айтуынша, бағдарлама Жапонияның ең мықты университеттері мен зерттеу орталықтарын көру мүмкіндігін берді. Нагойя университетінің нанотехнологиялар зертханасында жұмыс істеп көрді. Сондай-ақ Окадзаки мектебінде сабақ өткізіп, жапон оқушыларына қазақ дәстүрлері туралы айтып берді.

Алем Аменов — бірнеше республикалық және халықаралық олимпиадалардың жүлдегері. Ол республикалық жалпы білім беретін пәндер олимпиадасында информатикадан күміс медаль, Еуропалық жасөспірімдер информатика олимпиадасында (EJOI) күміс медаль, Шанхай ынтымақтастық ұйымына мүше елдер арасында XV Еуразиялық олимпиадада қола медаль және Жәутіков олимпиадасында қола медаль иеленген.

Бағдарлама бойынша оқуды аяқтағаннан кейін Алем Аменов халықаралық жобаға қатысқандығын растайтын сертификатпен марапатталды.

Абай облысы білім басқармасының баспасөз қызметі