Алматы облысы мен Қытай Халық Республикасының экономикалық әріптестігі жақсы нәтиже көрсетуде

2023 жылдың қорытындысы бойынша екі ел арасындағы тауар айналымы 1,1 млрд АҚШ долларын құрады.

Бұл туралы Алматы облысының әкімі Марат Сұлтанғазиев, Шыңжаң-Ұйғыр автономиялық ауданынан келген делегациямен ресми кездесуінде мәлімдеді.

Өңір басшысы өз сөзінде, облыста экономикалық байланыстарды жаңғырту және нығайту бағытындағы жүргізіліп жатқан жұмыстардың белсенді екенін атап өтті.

Марат Сұлтанғазиев, «Коммерциялық айналымды одан әрі арттыру мақсатында «Қалжат құрғақ порты» деп аталатын халықаралық цифрлы көліктік-логистика хабын енгізу жоспарлануда. Логистика мен сауда саласындағы бизнесті дамытуға арналған, заманауи алаң салу жобасына жергілікті инвесторлар да қызығушылық танытып үлгерді. Бұл жоба Қытайдан жүк тасымалдауды ұлғайтып, көліктік және ауыстырып тиеу қызметін атқаратын маңызды алаң болмақ.

Өз сөзінде облыстың бірінші басшысы өңірдегі халықаралық қатынастарды дамытудағы елеулі прогресті атап өтті. Оның айтуынша, табыс экономиканың түрлі салаларында инвестициялық жобаларды іске асырумен байланысты.

«Бірлескен инвестициялық жобаларды іске асыру экономикалық өсуге ғана емес, шетелдік әріптестермен байланысты нығайтуға да ықпал етеді. Осының арқасында біздің өңіріміз әртүрлі елдердің инвесторлары мен кәсіпкерлері үшін барған сайын тартымды бола түсуде, бұл жалпы өркендеу мен дамуға ықпал етеді», — деп атап өтті Марат Сұлтанғазиев.
Шыңжаң-Ұйғыр автономиясының халық үкіметінің төрағасы Эркин Туниязу Қазақстан мен ШҰАР арасындағы сауда, өнеркәсіп, көлік, логистика, ауыл шаруашылығы және туризм сияқты түрлі салалардағы табысты ынтымақтастыққа ерекше тоқталды. Ол сондай-ақ бірлескен инвестициялық жобаларды жүзеге асыруда Алматы облысы мен ШҰАР ынтымақтастығының болашағына сенім білдірді.

«Қазақстанның негізгі көлік жолдарының қиылысында орналасқан Алматы облысы, логистика мен сауданың қарқынды дамуына ықпал ететін стратегиялық орталық болып табылады. Алматы қаласы мен Қытай шекарасының жақын орналасуы бұл аймақтың маңызды көлік торабы ғана емес, сонымен қатар жүк және жолаушы тасымалын ұлғайтудың қуатты катализаторы. Бұл өңірлер арасындағы тиімді байланысты қамтамасыз етіп, аймақтық деңгейде де, ұлттық деңгейде де экономикалық дамуға септігін тигізеді», — деді Эркин Туниязу.

Соңында Эркин Туниязу, экономиканың түрлі салаларындағы екіжақты ынтымақтастықтың нығая түсетініне, сондай-ақ бұрын қол жеткізілген келісімдердің жүзеге асатынына сенім білдірді.