Астанада Орталық Азиядағы алғашқы Әлеуметтік Инновациялық Хаб ашылды

Астанада Орталық Азиядағы алғашқы Әлеуметтік Инновациялық Хабтың ресми ашылуы өтті. Бұл – адамдардың өмірін жақсы жаққа өзгертуді мақсат еткен әлеуметтік кәсіпкерлер, билік өкілдері мен қоғам белсенділері бас қосқан ерекше алаң.

Шараға еліміздің түкпір-түкпірінен келген әлеуметтік кәсіпкерлер, танымал қоғам қайраткерлері мен БАҚ өкілдері қатысты.

Хаб Астана қаласы әкімдігінің және Қазақстандағы әлеуметтік инвесторлар қауымдастығының қолдауымен ашылды. Бұл – қоғамдық құндылық жасайтын, әлеуметтік стартап ашқысы келетін, оқып-үйреніп, менторлық қолдау алғысы келетін жандар үшін тартылыс орталығы.
Хаб қабырғасында social concept store жұмыс істейді — мұнда әлеуметтік кәсіпкерлердің өнімдері ұсынылған. Сондай-ақ, бариста мектебі мен әлеуметтік кофехана іске қосылған, онда есту қабілеті шектеулі жандар білім алып, жұмысқа орналасып жатыр.

Хабтың миссиясы — Қазақстанда және Орталық Азияда әлеуметтік кәсіпкерлікті дамыту, инклюзия, тұрақтылық және тең мүмкіндік идеяларын ілгерілету.

Ашылу салтанатында сөз сөйлеген Астана қаласы Кәсіпкерлікті дамыту және инвестициялар басқармасы басшысының орынбасары Қуаныш Сапаров:

«Бүгінде Қазақстанда 1317 әлеуметтік кәсіпкерлік субъектісі тіркелсе, оның 255-і Астанада жұмыс істейді. Астана әкімдігінің қолдауымен 58 грант берілді. Биыл тағы 50 грант жоспарланған. Кәсіпкерлікті қолдау қоры арқылы 28 кәсіпкерге жеңілдетілген пайызбен несие берілсе, СПК „Астана“ арқылы 19 кәсіпкерге жеңілдікпен жалға берілетін орын ұсынылды», – деп айтты.

Эмин Аскеров, Social Innovation Hub төрағасы: «Хабты құру идеясы пайда болған сәттен бастап бүгінгі іске қосылуына дейін 4 жыл өтті. Енді бұл „үйдің“ есігі тек Қазақстан үшін емес, бүкіл Орталық Азия үшін ашық. Алда үлкен жоспарлар бар. Біз аймақтағы жетекші күшке айналып, жаһандық қорлар мен орталықтармен бірге әлеуметтік өзгерістерге қол жеткізуді көздейміз».

Шара аясында әлеуметтік кәсіпкерлерге арналған Дархан Жәгіпаровтың фотокөрмесі, «Жақсылық елшісі» премиясының марапаттау рәсімі, сондай-ақ Эмин Аскеровтың «Аскеров әсері» атты кітабының таныстырылымы өтті.

Фото: Диана Ким