Елордалық сахнада – балалар

2 сәуір Дүниежүзілік аутизм мәселесі туралы ақпарат тарату күні аясында «Астана Опера» театрының К.Байсейітова атындағы Камералық залы сахнасында «Күн барлығына нұрын төгеді» қайырымдылық концерті өтті. Шараға қатысқан түрлі диагноздары бар балалар үшін еліміздің бас театрларының біріндегі бұл өнер көрсету нағыз жетістік болды.

«Астана Опера» қайырымдылық қызметін 12 театр маусымы бойы белсенді жалғастырып келеді. Мұндай шаралар театрдың ізгі амалдарға бастап, қуаныш сыйлай алатынын дәлелдейді.

Осынау концерттің ұйымдастырушыларының бірі, Abaqus-daryn білім қорының жетекшісі Дархан Әжмолдаевтың айтуынша, балалар осынау шараға үлкен құштарлықпен дайындалған.

— Бұл концертке қатысу – олар үшін алға үлкен қадам болып табылады. Біз әрдайым қатысушыларды көптеп тартуға тырысамыз, дегенмен биыл түрлі жанрлардағы ең дарынды балаларға басымдық беруді ұйғардық, — деді ол.

Өткен жылдары концерт камералық сипатта өткізіліп келсе, бұл жолы шара ойластырылған режиссерлік шешімдермен, сондай-ақ өнер мен шоу-бизнестен танымал тұлғалардың қатысуымен ауқымды форматқа ие болды.

— Біздің негізгі мақсатымыз – осынау концертті ерекше қажеттіліктері бар балалар жайлы біле бермейтін барлық адам үшін нағыз жаңалыққа айналдыру болды. Бастысы, оларға деген қамқорлығымыз жылына бір күнмен ғана шектелмесе екен, — деп атап өтті Дархан Әжмолдаев.

Дамуында ерекшеліктері бар көптеген бала қазіргі таңда қоғамымызда өз замандастарымен қатар қабылданып жүргенін атап өтуіміз қажет. Бұрын мұндай балалар назардан тыс қалатын, бірақ қазір жағдай өзгерді. Инклюзивтік білім берудің және қоғам тарапынан көрсетілетін қолдаудың арқасында олар білім алуда, ойнауда және өзге балалармен араласуда. Бұл олардың өздеріне ғана емес, сондай-ақ айналасындағы жандарға да адамдардың әртүрлі екенін түсінуге көмектеседі. Осылайша біз бір-бірімізге неғұрлым мейірімді және ашық бола түсеміз.

Мазмұнды концерт бағдарламасы ешкімді жалықтырған жоқ, балалар да, олардың ата-аналары да рақатқа бөленді. Қатысушылардың репертуары сан алуан болды, оған қазақ халық әндері мен билері, алыс-жақын шетел композиторларының аспаптық туындылары енді.

— «Күн барлығына нұрын төгеді» концертіне қатысу Жігер үшін – өз әлеуетін ашуға, өзіне деген сенімділігін оятуға және музыкаға деген махаббатын көрермендермен бөлісуге мүмкіндік. Ол ән айтқанды жақсы көреді және әрбір өнер көрсету оған зор қуаныш сыйлайды. Әрбір концерт сайын оның өзіне деген сенімділігі артқанын, өзін сахнада еркін сезіне бастағанын және көрермендердің алдында сасқалақтап қалмайтынын байқаймын. Бұл көбінесе оның вокалдан сабақ беретін керемет ұстазы Дарын Қанатұлы Бисариновтың еңбегі. Оның қолдауының, кәсіби шеберлігі мен Жігерге деген сенімінің арқасында менің балам ашылып, шығармашылық жағынан дамуды жалғастыруда. Мұндай концерттер біздің балаларымыз үшін өте қажет, өйткені олар дарынын дамытуға және сондай-ақ қоғамға бейімдеуге, ішкі кедергілерді жеңуге, балалардың өздерін қажетті сезінуіне көмектеседі. Осы мүмкіндікті бергені үшін ұйымдастырушыларға өте ризамыз, ал Жігер келесі жаңа өнер көрсетуді асыға күтуде, — деді концерттен кейін пікірімен бөліскен осы жобаның тұрақты қатысушысы Жігер Ахметқалидің анасы Самал Шаяхина.

Сахнадағы өнер көрсету барлық бала үшін ұмытылмастай болды. Бұл олардың өміріндегі кішігірім, бірақ айтулы жеңістері. Өйткені ерекшеліктері бар балалардың күнделікті жолы – бұл АВА-терапист, логопед, психолог, бейімделген дене шынықтыру нұсқаушылары сынды тұтас мамандар тобы жұмысының нәтижесі.

— Әр ата-ана баласын сахнада көруді армандайды және оның жетістіктерін мақтан етеді. Қарапайым адамдар үшін бұл болмашы қадам болып көрінуі мүмкін, алайда оның артында қаншама жылғы еңбек жатыр, – деді қор жетекшісі.

Ол Владислав Толамасовты мысалға келтіріп өтті. Владислав сабақты Abaqus-daryn орталығында бастап, велосипед тебуді үйренген екен, ал енді велоспорт бойынша қала чемпионы атанып отыр. Қазір ол республикалық жарыстарға дайындалуда.

«Күн барлығына нұрын төгеді» – бұл балалар мен олардың ата-аналарына арналған «Астана Операдағы» жыл сайынғы дәстүрлі мереке, сондай-ақ ерекше балалардың қолдауға мұқтаж екені, қасында көмектесуге дайын жандар болғанда олар зор жетістіктерге жете алатыны туралы қоғамға маңызды үндеу болып табылады.

Telegram-канал: «Астана Опера» театрының К.Байсейітова атындағы Камералық залы сахнасында «Күн барлығына нұрын төгеді» қайырымдылық концерті өтті