Халықаралық инженерлік-технологиялық университетінде III Халықаралық форум өтті

2024 жылғы 11 желтоқсанда Халықаралық инженерлік-технологиялық университетінде «Жаһандану жағдайында білім беру бағдарламаларын жобалау және іске асыру сапасының индикаторы ретінде жұмыс берушінің кәсіби даярлықтағы рөлін арттыру» тақырыбында III Халықаралық форум өтті.

Форумға  білім беру сапасын арттыру және университеттер мен жұмыс берушілер арасындағы өзара әрекеттестікті нығайту мәселелерін талқылау үшін жетекші сарапшылар, оқытушылар және бизнес өкілдері қатысты.

Форум кәсіби даярлық саласында тәжірибе алмасу және инновациялық әдістерді енгізу үшін маңызды алаңға айналды.

Форумның салтанатты ашылуында Халықаралық инженерлік-технологиялық университетінің ректоры Гүлнар Сарсенбекова сөз сөйлеп, университеттер мен жұмыс берушілер арасындағы байланысты нығайтудың білім сапасын арттыру және динамикалық дамып келе жатқан салалар үшін жоғары білікті кадрларды даярлаудағы маңыздылығын атап өтті.

Форумның негізгі спикерлері:

• Тони Сан, Huatec компаниясының халықаралық білім беру жоспарлау директоры (Пекин, Қытай), білім беру реформасы мен біліктілікті арттырудағы көшбасшылық және жаңашыл білім беру концепциялары туралы айтты.
• Хон Джин Сон, Korea Global (Корея) орталығының директоры Қазақстанның өңдеу өнеркәсібі үшін МИТУ бар экожүйені құру және практикалық цифрлық индустрияны дамыту туралы тақырыпты ашты;
• Доктор Ибрагим Кубилай, Сулейман Демирель университеті сыртқы байланыстар департаментінің басшысы (Испарта, Түркия), университеттердің білім, ғылым және өнеркәсіп интеграциясындағы рөлі туралы талқылады.
• Жанна Искенова, Қазақстан мен Орталық Азиядағы ACCA өкілдігінің басшысы, МИТУ студенттерін ACCA халықаралық стандарттарына сәйкес кәсіби даярлау туралы баяндамасын ұсынды.
• Жанар Туребекова, ҚР Кәсіпкерлерінің Ұлттық палатасы «Атамекен» директорының орынбасары, шағын кәсіпкерлікті дамыту және халықаралық ынтымақтастықтың өзекті мәселелері туралы бөлісті.
• Тахир Такабаев, «Академсеть» компаниясының бас директоры, Қазақстандағы IT мамандықтары бойынша өндірістік-практикалық базаларды дамыту туралы сөз сөйледі.

Форумда ерекше назар аударылған тақырыптар:

• Университеттер мен жұмыс берушілер арасындағы кәсіби құзыреттіліктерді қалыптастырудағы өзара әрекеттестік.
• Білім беру мен кәсіби даму саласындағы көшбасшылық.
• Білім беру және бизнес секторындағы инновациялық тәжірибелерді дамыту.

Форум барысында МИТУ-дағы заманауи зертханалардың ашылуы маңызды кезең болды.

Форум аясында бағдарламалық инженерия, биохимиялық инженерия, азық-түлік өндірісі технологиялары және смарт-технологиялар саласындағы ғылыми-зерттеу зертханаларының салтанатты ашылуы өтті.

Бұл инновациялық кеңістіктер студенттер мен зерттеушілер үшін жаңа мүмкіндіктер ашып, нарықтың қазіргі талаптарына сәйкес мамандарды практикалық даярлауға мүмкіндік береді.

Іс-шара зертханалар мен зерттеу орталықтарын дамыту, халықаралық стандарттар мен заманауи салалардың талаптарына сәйкес келтіру сияқты өзекті мәселелерді талқылаумен жалғасты.

Форум сарапшылары биохимиялық инженерия, смарт-технологиялар және экономика сияқты әртүрлі бағыттар бойынша жұмыс сессияларына қатысып, студенттерді білдірді.

Форум аясында  «Аксай Нан», «Korean Global center», «MaxImagine», «Goji», ««Ifc Colos»» кәсіпорындарымен  келісім-шарттарға  қол қойылып,  университетпен білім беру саласындағы ынтымақтастыққа қосқан үлестері үшін  бірнеше кәсіпорын марапатталды.

Форум білім беру саласындағы академиялық қауымдастықты, жұмыс берушілерді және студенттерді біріктіріп, халықаралық стандарттарға сай тиімді кәсіби даярлық жүйесін құруға ықпал ететін маңызды дәстүрлі іс-шараға айналды.