Қазақстан мен Үндістан арасындағы достық пен мәдениетті тоғыстырған кеш

Алматы қаласында Үндістан Республикасының жарияланғанына 77 жыл толуына арналған салтанатты концерт ұйымдастырылды. Іс-шара Қазақстандағы Үндістан Елшілігі мен Астанадағы Үндістан Елшілігі жанындағы Свами Вивекананда атындағы мәдени орталықтың бірлескен бастамасымен өтіп, екі ел арасындағы мәдени диалогтың айқын белгісіне айналды.

Мерекелік кешке қала әкімдігі өкілдері, дипломаттар, өнер және мәдениет қайраткерлері, қоғамдық ұйым мүшелері, студенттер мен оқытушылар, сондай-ақ үнді өнеріне қызығушылық танытқан тұрғындар қатысты. Құрметті меймандар қатарында Үндістанның Қазақстандағы Төтенше және Өкілетті Елшісі Сайлас Тангал және Алматы қаласы Мәдениет басқармасының басшысы Данияр Алиев болды.

Концерттің Құрманғазы атындағы Қазақ ұлттық консерваториясында өтуі шараның мәртебесін арттыра түсті. Оқу орнының ректоры Гаухар Тасбергенованың қолдауы мәдени әріптестіктің институционалдық деңгейде де нығайып келе жатқанын көрсетті.

Ұйымдастырушылар мұндай кездесулердің маңызы зор екенін атап өтті. Олар тек тарихи даталарды атап өтумен шектелмей, халықтар арасындағы рухани жақындастықты арттырып, білім мен мәдениет саласындағы ынтымақтастыққа жаңа серпін береді. Сонымен бірге Үндістанның терең тарихы мен бай дәстүрін қазақстандық аудиторияға кеңінен таныстыруға мүмкіндік жасайды.

Кештің көркемдік өзегін «Үнді классикалық биі мен йога орталығы, Алматы – Қазақстан» ұжымы ұсынған концерттік бағдарлама құрады. Орталықтың жетекшісі Қазақстанның еңбек сіңірген қайраткері Ақмарал Қайназарова. 2006 жылдан бері жұмыс істеп келе жатқан бұл ұйым елімізде ғана емес, бүкіл Орталық Азияда үнді классикалық би өнерін кәсіби түрде үйрететін бірегей мекеме ретінде танылған. Алдағы жылы орталық өзінің 20 жылдық мерейтойын атап өтпек.

Сахнада ұсынылған би нөмірлері ежелгі үнді эпостарына, философиялық ой-тұжырымдарға және рухани ілімдерге негізделді. Әр қимыл мен ишара, әр ырғақ көрерменді терең мағынаға жетелеп, үнді мәдениетінің көркемдігі мен символдық байлығын айқын көрсетті. Кеш көрермендері әр қойылымды ыстық ықыласпен қабылдап, ұзақ қол соғып отырды.

Бұл мерекелік концерт мәдени шара шеңберінен асып, екі халықтың достығын бекемдейтін маңызды алаңға айналды. Қонақтар мен қатысушылар мұндай бастамалар болашақта білім, өнер және гуманитарлық байланыстардың кеңеюіне жол ашатынын ерекше атап өтті.

Алматы төріндегі бұл кеш Қазақстан мен Үндістан арасындағы мәдени ықпалдастықтың берік екенін тағы бір дәлелдеп, үнді өркениетінің сан қырлы мұрасына деген қазақстандықтардың қызығушылығы жылдан жылға артып келе жатқанын аңғартты.