Қытай АҚШ-тан импортталатын барлық тауарларға қосымша тарифтер енгізеді

Xinhua News ақпараттық агенттігінің хабарлауынша, Қытай 10 сәуірден бастап Америка Құрама Штаттарынан импортталатын барлық тауарларға 34% мөлшерінде қосымша тарифтер енгізетінін жариялады. Бұл туралы жұма күні ҚХР Мемлекеттік кеңесінің Кедендік тарифтер жөніндегі комиссиясы мәлімдеді.

Бұл шешім АҚШ-тың Қытай экспортына «өзара тарифтер» енгізу туралы шешіміне жауап ретінде қабылданды. Комиссияның пікірінше, Вашингтонның бұл қадамы халықаралық сауда ережелеріне сәйкес келмейді, Қытайдың заңды құқықтары мен мүдделеріне елеулі нұқсан келтіреді және «біржақты қорқытудың» айқын үлгісі болып табылады.

Комиссия бұл тарифтердің Қытайдың ұлттық мүдделерін қорғауға және екі ел арасындағы сауда қатынастарын теңестіруге бағытталғанын атап өтті. Соңғы жылдары өзара экономикалық шектеулер салдарынан күрделене түскен сауда байланыстары осылайша реттелмек. Бұл қадам Пекин мен Вашингтон арасындағы сауда қақтығысының жаңа кезеңі ретінде қарастырылуда, ол бірнеше жыл бұрын басталып, әлемдік нарықтарға әсер етуді жалғастыруда.

«АҚШ өз әрекеттерімен әділ сауданың негіздерін бұзады. Қытай өз экономикасын және өндірушілерінің мүдделерін қорғау үшін жауап шараларын қабылдауға мәжбүр», — деп мәлімдеді комиссия ресми хабарламасында.

Жаңа тарифтер АҚШ-тан келетін ауыл шаруашылығы өнімдері, өнеркәсіп тауарлары және тұтыну заттарын қамтитын кең ауқымды тауарларға әсер етеді. Сарапшылар бұл шешім АҚШ-тың ішкі нарығында бағаның тағы бір өсуіне әкелуі мүмкін екенін, сондай-ақ екі елдің жеткізу тізбектеріне ықпал ететінін болжайды.

Осы жылдың басында АҚШ американдық өндірушілерді қорғау және сауда тапшылығын азайту қажеттілігін алға тартып, қытай тауарларына қосымша баж салығын енгізген болатын. Ал Қытай бірнеше рет дауларды келіссөздер арқылы шешуге шақырғанымен, Вашингтонның соңғы қадамдары, Пекиннің пікірінше, диалогтың мүмкіндігін азайтуда.

Сарапшылар әлемнің екі ірі экономикасы арасындағы сауда соғысы жаһандық экономикаға қысым көрсетіп, қаржы нарықтарында тұрақсыздық тудырып, әлемдік өсім қарқынын баяулататынын атап өтуде. Жаңа тарифтердің енгізілуі Қытай мен АҚШ арасындағы технология және геосаясат салаларындағы қатынастарға да әсер етуі мүмкін.

Қытай тарапы АҚШ тарапынан шиеленіс күшейген жағдайда қосымша шаралар қабылдау құқығын өзіне қалдыратынын мәлімдеді. Алдағы күндері халықаралық қоғамдастық пен бизнес өкілдері бұл шешімнің салдарына өз бағасын беретіні күтілуде.

Ғазиза Ұзақ

Telegram-канал: Қытай АҚШ-тан импортталатын барлық тауарларға қосымша тарифтер енгізеді