METU жаңа студенттерін қарсы алды

Халықаралық инженерлік-технологиялық университетінде (METU) оқу жылының ең жарқын әрі маңызды шараларының бірі — «Студенттер қатарына қабылдау – 2025» салтанатты рәсімі өтті. Бұл кеш университет басшылығын, профессорлық-оқытушылық құрамды, жоғары курс студенттерін және жаңа бастаған бірінші курс студенттерін біріктіріп, олардың үлкен университеттік өмірге ресми түрде қадам басуына куә болды.

Қатысушыларға құттықтау сөзін университет ректоры Ақпанбетов Дархан Берікұлы жолдап, METU-дағы оқу — тек білім алу ғана емес, өзін-өзі дамыту, кәсіби қалыптасу және жаңа мүмкіндіктерге жол ашу кезеңі екенін атап өтті.
Салтанат барысында METU-дың үздік студенттері марапатталды. Ректор олардың жоғары академиялық жетістіктері мен университет өміріне белсенді қатысқаны үшін алғыс хаттар табыстап, студенттердің табыстары бүкіл университет қауымдастығының дамуына қосқан маңызды үлес екенін атап өтті.

1 курс студенттерін құттықтауға Қазақ жеміс-көкөніс шаруашылығы ғылыми-зерттеу институты, Ж.Жиембаев атындағы өсімдіктерді қорғау және карантин жөніндегі Қазақ ғылыми-зерттеу институтының, Зоология ғылыми-зерттеу институтының басшылары мен “Ақсай нан-тоқаш комбинаты”, ЖШС “SeaStar” сияқты жұмысберушілер де келіп, өз тілектерін білдірді.

Шараның жалғасы ретінде шетелдік серіктес университеттерден бейнеқұттықтаулар көрсетіліп, олар METU студенттеріне жылы лебіздерін білдіріп, халықаралық ынтымақтастықты одан әрі нығайту ниетін жеткізді.
Кештің маңызды сәттерінің бірі – МИТУ-дың Ғылыми студенттік ұйымының (НСО) қайта жанданғаны туралы ресми жариялау болды.

Бұл ұйым ғылым мен инновацияға қызығушылық танытқан жас зерттеушілер үшін жаңа мүмкіндіктер алаңы болмақ. Студенттер университеттің ғылыми жобаларына қатысып, заманауи жабдықтармен жұмыс жасап, прототиптер әзірлеп, еліміздің ғылыми-технологиялық дамуына үлес қосуға мүмкіндік алады.

Салтанат аясында МИТУ Ғылыми студенттік ұйымының жаңа мүшелерін қабылдау рәсімі де өтті. Жоба жетекшілері оларды алғашқы ғылыми жетістіктері үшін марапаттап, сертификаттар мен ақшалай сыйақылар табыс етті. Бұл — олардың еңбегін мойындау әрі алдағы ғылыми ізденістерге жігер беру мақсатында жасалған қадам.

«Студенттер қатарына қабылдау – 2025» салтанаты METU-дың білімге ұмтылу, шығармашылық, жастық, бастамашылдық және үнемі жетілу сияқты басты құндылықтарын айқындай отырып, барлық қатысушылардың жүрегінде ерекше әсер қалдырған маңызды оқиғаға айналды.

Іс-шара барысында Алматы қаласы Жастар саясаты басқармасының басшысының орынбасары Кенесбай Алмаз Абайұлы Алматы қаласы мен университеттің дамуына қосқан үлестері үшін бірнеше студентті арнайы алғыс хаттармен мараппатады.