Орталық Азия және Шығанақ елдері өңіраралық серіктестікті нығайтуда

Қазақстан Республикасы Премьер-министрінің орынбасары – Сыртқы істер министрі Мұрат Нұртілеу бастаған қазақ делегациясы «Орталық Азия – Шығанақтағы араб мемлекеттері ынтымақтастығы кеңесі» (ОА-ШАМЫК) форматындағы 3-ші министрлік кездесуге қатысты.

Іс-шара аясында тараптар өңіраралық ынтымақтастықтың қазіргі жағдайы мен келешегін талқылап, халықаралық күн тәртібіндегі өзекті мәселелер бойынша пікір алмасты. Қазақ делегациясының басшысы өз сөзінде «ОА–ШАМЫК» алаңының жуырда ғана құрылуына қарамастан, бұл құрылым «С5+» форматы аясындағы перспективті өзара іс-қимыл механизмі ретінде қалыптасып келе жатқанын атап өтті.

Кездесу барысында негізгі салаларда нақты ынтымақтастықты кеңейтуге ерекше көңіл бөлінді. Қазақ тарапы өзара келісілген әрекеттер сауда-экономикалық байланысты жандандыруға, орнықты логистикалық бағыттар қалыптастыруға және азық-түлік қауіпсіздігін арттыруға мүмкіндік беретініне сенім білдірді.

Басым салалар ретінде инвестициялар, агроөнеркәсіп, көлік инфрақұрылымы, жаңартылатын энергия көздері, климат, геология, цифрландыру және инновациялар аталды.

ҚР СІМ басшысы сирек кездесетін және стратегиялық маңызды шикізат саласындағы ынтымақтастықтың өзектілігін ерекше атап өтті. «Қазақстанда жалпы құны 46 триллион АҚШ долларынан асатын 5 мыңнан астам кен орны бар. Біз ШАМЫК елдерінен серіктестерді барлаудан бастап өңдеу мен инновациялық шешімдерді енгізуге дейінгі барлық кезеңдерді қамтитын бірлескен жобаларды жүзеге асыруға шақырамыз», – деді М.Нұртілеу.

Ол сонымен қатар серіктестікті технологиялық тұрғыда трансформациялаудың маңыздылығына тоқталды. Қазақстан цифрлық шешімдер мен жасанды интеллектті дамытуға белсенді инвестиция салуда. Министр Астанада Халықаралық жасанды интеллект жөніндегі кеңестің құрылуы және Alem.AI орталығының іске қосылуы туралы хабардар етті. Бұл платформа стартаптарды, ғылыми жобаларды және технологиялық әзірлемелерді қолдауға бағытталған.

Гуманитарлық ынтымақтастықты кеңейту мақсатында Қазақстан білім, спорт, туризм және мәдени байланыстар салаларында өзара іс-қимылды ілгерілетуге ниетті екенін білдірді. Сонымен қатар Шығанақ елдерінен келетін туристер үшін Орталық Азия бойынша бірыңғай туристік бағыт қалыптастыру ұсынылды.

«Орталық Азия мен ШАМЫК елдері арасындағы серіктестік ортақ экономикалық мүдделермен қатар терең тарихи және мәдени байланыстарға негізделген. Біз достас Шығанақ мемлекеттерден ресми делегациялар, іскерлік топтар мен азаматтарды ү.ж. мамырда өтетін Астана халықаралық форумында қуана қарсы аламыз», – деді М.Нұртілеу.

Сонымен қатар кездесуге қатысушы делегациялардың басшылары Кувейт Тақ мұрагері Мишаал әл-Ахмад әл-Джабер ас-Сабахтың қабылдауында болды. Кездесуде саяси диалогты нығайту, экономикалық ынтымақтастықты кеңейту және гуманитарлық өзара іс-қимылды арттыру мәселелері талқыланды.

Қазақстан Республикасы Сыртқы істер министрлігі