Ұжым мен оқушылар құрметті ұстазды лайықты марапатымен құттықтады

«Қазақстанның еңбек сіңірген ұстазы» атағына ие болған Семейлік Наталья Тегай бүгін Астана қаласынан марапатымен оралды.

Қадірлі ұстазды Білім басқармасы мен білім бөлімі өкілдері және мектеп ұжымы, шәкірттері зор ықыласпен күтіп алды. Үлкен өмірге талай шәкірттерді шыңдаған, жанға шабыт бітіріп, қаламға қанат байлатқан ұстаз еңбегі үлкен марапатпен өлшенгеніне педагог ұжымының алғысы шексіз.

Мұғалімдер күні қарсаңында Мемлекет басшысы Білім беру ісіндегі аса үздік жетістіктері және Қазақстан Республикасына сіңірген айрықша еңбегі үшін педагогке «Қазақстанның еңбек сіңірген ұстазы» атағын тапсырды.

Наталья Тегай – еңбек өтілі 43 жылды құрайтын тәжірибелі ұстаз, Алматы облысы, Талғар ауданында дүниеге келген. Жоғары білімді маман ретінде ол өзінің саналы ғұмырын жас ұрпақты тәрбиелеуге арнаған. Білім беру саласында жетістіктерге жетіп, үлкен тәжірибе жинаған ұстаз. Оның шәкірттері республикалық және халықаралық деңгейдегі олимпиадаларда жүлделі орындарға ие болып келеді.

Абай облысының ББ баспасөз қызметі