Алматыда EURASIAN FASHION WEEK сән апталығының 12-маусымы өтті

Алматыда 22–23 қазанда өткен EURASIAN FASHION WEEK халықаралық сән апталығы дизайнерлерді, сән индустриясының өкілдерін және жас авторларды бір алаңға жинады. Көктем-жаз 2027 маусымына арналған шараның негізгі тақырыбы SYNERGY тұжырымдамасына арналды. Бағдарламада ұлттық мәдени мұраны заманауи үлгіде таныстыру, жас дизайнерлерді қолдау және әлеуметтік маңызы бар жобаларға назар аударылды.

The Ritz-Carlton Almaty қонақүйінде ұйымдастырылған екі күндік шараға Қазақстанмен қатар Оңтүстік Корея, Таиланд, Польша, Беларусь және басқа елдердің сән өкілдері қатысты. SYNERGY, яғни «Синергия» тақырыбы мәдениеттер мен эстетикалардың, дәстүр мен заманауи көзқарастың өзара ықпалдастығын білдіреді.

Шараның халықаралық бағдарламасында Оңтүстік Кореяның DAILY MIRROR бренді, Таиландтың EVERYWEEK OUTFIT дизайнерлік дуэті және Польшаның HECTOR & KARGER бренді ерекше орын алды.

DAILY MIRROR креативті директоры Ким Джу Хан ерлер мен әйелдер сәнінің элементтерін, құрылымдық пішіндер мен жұмсақ фактураларды үйлестіретін топтамасын ұсынды. Ал EVERYWEEK OUTFIT-тің WOVEN LIGHT топтамасына Солтүстік Таиландтың мәдени мұрасы мен Чиангмай қаласының дәстүрлері арқау болған. Дизайнерлер дәстүрлі тоқыма әдістерін заманауи пішіндермен ұштастырды.

Польшаның HECTOR & KARGER бренді көктем-жаз 2027 топтамасында 1980 жылдар эстетикасын, айқын геометриялық пішіндерді және классикалық тігін үлгілерін заманауи әйел бейнесімен үйлестірді.

Халықаралық қатысушылардың жұмыстары сән апталығының мәдени және кәсіби тәжірибе алмасу алаңы ретіндегі маңызын көрсетті.

Қазақстандық дизайнерлер де ұлттық мәдениетті жаңа қырынан таныстыруға басымдық берді. HUSL бренді дизайнер Исламбек Шарипов әзірлеген ALASH топтамасын ұсынды. Жоба қазақ халқының мәдени мұрасы, бірлік пен еркіндік идеяларын заманауи киім үлгілері арқылы жеткізуге бағытталған.

TAMYR сән үйі, ZHUMAN және NURASEM брендтері этникалық бағыттағы топтамаларын көрсетті. Олардың жұмыстарында ұлттық киімнің элементтері заманауи силуэттермен және дизайн шешімдерімен үйлесім тапты.

Қазақстандық дизайнерлер үшін дәстүрлі мәдениет тек сәндік элементтердің қайнар көзі емес, сонымен қатар өзіндік шығармашылық тіл қалыптастырудың негізі ретінде көрінді.

EURASIAN FASHION WEEK бағдарламасының маңызды бөлігі әлеуметтік бастамаларға арналды. Солардың бірі – сүт безі қатерлі ісігі туралы хабардарлықты арттыруға бағытталған PINK OCTOBER жобасы.

23 қазанда Onco Senim қоғамдық қорымен бірлесіп дайындалған HAUTE COUTURE 15:53 аудиовизуалды жобасы ұсынылды. Подиумға сүт безі қатерлі ісігінен емделіп, қалпына келген он әйел шықты. Дизайнер Арай Бектұрсын олар үшін арнайы он образ әзірледі.

Топтамадағы қара және қызғылт түстер әйелдердің өмір жолындағы күрес, күш, сенімділік пен нәзіктік ұғымдарын бейнеледі. Жоба сән көрсетілімінен бөлек, аурудан кейінгі өмір, өзін қабылдау және психологиялық қолдау мәселелеріне назар аударды.

Ұйымдастырушылардың мәліметінше, билеттер мен ұсынылған киім үлгілерін сатудан түскен қаражатты емнен кейін қалпына келіп жатқан әйелдерге арналған арт-терапия бағдарламаларын жалғастыруға бағыттау жоспарланған.

Әлеуметтік бағыттағы тағы бір бастама – KIDS FASHION DAY. Оның аясында даму ерекшеліктері бар және ауыр дерттерден емделген балалар басқа қатысушылармен бірге подиумға шықты. Жоба инклюзия, қоғамға бейімделу және әр баланың өзін еркін көрсетуіне мүмкіндік беру идеясын алға тартты.

Сән апталығында FASHION FOR FUTURE халықаралық байқауының финалистері де өз топтамаларын таныстырды. Байқау Қазақстан, Ресей, Қырғызстан және Ираннан келген жас авторларға кәсіби ортада тәжірибе жинауға мүмкіндік берді.

Биыл EURASIAN FASHION WEEK аясында алғаш рет Алматы технологиялық университетінің «Жас Өркен» байқауы финалистерінің коллекциялары да көрсетілді. Бұл бастама жас дизайнерлердің шығармашылық әлеуетін ашуға және олардың сән индустриясындағы кәсіби жолын қалыптастыруға бағытталған.

EURASIAN FASHION WEEK-тің 12-маусымы сәнді киім үлгілерін көрсетумен шектелмей, халықаралық ынтымақтастық, ұлттық мәдениетті жаңаша таныту, жас таланттарды қолдау және әлеуметтік мәселелерді көтеру алаңы ретінде өтті. SYNERGY тұжырымдамасы осы бағыттарды біріктіріп, заманауи сәннің мәдениет пен қоғам арасындағы диалогқа қосатын үлесін көрсетті.