Азия ойындарында Қазақстан елінің туы көтерілді

Қазақстан құрамасы Азия ойындарына қатысу үшін Қытайдың Ханчжоу қаласына келді. Осыған орай байрақты бәсеке қарсаңында Қазақстанның Мемлекеттік Туын көтеру рәсімі өтті.

Жазғы Азия ойындарының ресми ашылу салтанаты 23 қыркүйекте өтеді. Қазақстан ұлттық құрамасының сапында 524 спортшы бар. Олар жарыс бағдарламасына қосылған 40 спорт түрінің 30-на қатысады. Отандық спортшылар 44 дициплина бойынша марапатқа таласады, онда 305 медаль жиынтығы сарапқа салынады. Жалпы Азиадада 61 дициплина бойынша 481 медаль жиынтығы ойнатылады.

«Жақын күндері үлкен спорт мерекесі басталады. Біздің спортшылар мен жаттықтырушылар оған ұзақ уақыт дайындалды. Әрине, біздің команда Қытайға жоғары нәтиже көрсету және отандастарымыздың үмітін ақтау үшін келді. Ту көтеру рәсімі үлкен доданың басталуын білдіреді. Осы Азия ойындарында Қазақстан Республикасының Мемлекеттік Туы бірнеше мәрте көтеріліп, спорт ареналарында Әнұранымыздың жиі шырқалғанын естиміз деп үміттенемін», — деді ҚР Туризм және спорт министрі Ермек Маржықпаев.