Энергетика министрі қазақстандық команданы электрмонтерлер арасындағы халықаралық байқаудағы жеңісімен құттықтады

Энергетиктерімізді мақтан тұтамыз! Қазақстан құрамасы түркі мемлекеттері арасындағы электромонтерлердің халықаралық жарысында жеңімпаз атанды!

Қазақстан энергетиктерінің құрама командасын Анкара қаласында өткен «2026 жылғы электр тарату желілері бойынша үздік команда» халықаралық кәсіби шеберлік байқауындағы жарқын жеңісімен шын жүректен құттықтаймын!

Ауқымды додаға Түркия, Әзербайжан, Қырғызстан, Өзбекстан, Венгрия, Түрікменстан және Қазақстанның ең мықты мамандары қатысты. Бәсекесі жоғары тартыста біздің энергетиктер отандық кәсіби мектептің жоғары деңгейін дәлелдеп, жеңіс тұғырының ең биік сатысына көтерілді.

Ел намысын Энергетика министрлігі «Оңтүстік Жарық Транзит» ЖШС-нің (Шымкент қаласы, «Қазақстан коммуналдық жүйелері» тобы) және «Энергосистема» ЖШС-нің (Ақтөбе облысы) үздік мамандары арасынан жасақтаған құрама команда қорғады. Тәжірибе, командалық үйлесім мен жоғары тәртіпті ұштастырған бұл бірлік елімізге басты жүлдені әкелді.

Бұл нәтижені динамикада бағалаудың маңызы ерекше: өткен жылы командамыз үшінші орын алған болатын. Жігіттеріміз кеткен қателіктермен сапалы жұмыс жүргізіп, бүгінгі таңда сөзсіз көш бастады. Түркиядағы TEDAŞ-тың күрделі жаттығу полигонында қазақстандық мамандар электр қондырғыларындағы қауіпті жұмыстарды орындау кезінде жоғары шеберлікті, шапшаңдықты және қауіпсіздік талаптарын мінсіз сақтайтынын көрсетті.

2027 жылы осы беделді салалық турнирді өткізу эстафетасын Қазақстан қабылдайды. Түркі әлемінің энергетиктерін өз жерімізде – рухани астанамыз Түркістан қаласында зор мақтанышпен қарсы аламыз.

«Оңтүстік Жарық Транзит» және «Энергосистема» кәсіпорындарының құрама командасының әрбір мүшесіне, тәлімгерлеріне және басшылығына жарқын жеңісі әрі Қазақстан энергетикасының халықаралық аренадағы жоғары беделін асқақтатқаны үшін шынайы алғысымды білдіремін!

Сіздерге зор денсаулық, апатсыз жұмыс және жаңа кәсіби биіктер тілеймін!

Ерлан Ақкенженов, Қазақстан Республикасының Энергетика министрі

Қазақстан Республикасы Энергетика министрлігі