Әділет министрлігінің Алматы қаласы әділет департаменті «HUGO BOSS» контрафактілік өнімдерін әшкереледі

2024 жылдың 28 тамызында Әділет министрлігінің Алматы қалалық департаменті «HUGO BOSS» тауар белгісін заңсыз пайдаланған жалған тауарларды сату фактісінің жолын кесті.

«HUGO BOSS AG» компаниясы өкілінің шағымы бойынша Алматы қаласының көтерме сауда базарларының бірінде ерлер киімін көтерме сатумен айналысатын жеке кәсіпкерге жоспардан тыс тексеру жүргізілді. Тексеру барысында «HUGO BOSS» тауар белгісін заңсыз пайдалану фактісі анықталды.

Үйлестірілген іс-қимылдар нәтижесінде 1.5 млн. теңгеден астам сомаға 1 600 бірлік жалған тауар тәркіленді.

Айта кету керек, бұл кәсіпкер жалған тауарларды Қазақстанның барлық өңірлеріне сатқан. Сондай-ақ, тауардың сатып алу құны нақты сомадан 300%-ға асатыны анықталды.

Қазіргі уақытта ҚР ӘҚБтК-нің 158-бабы бойынша кінәлі тұлғаға қатысты әкімшілік жауапкершілікке тарту мәселесі қаралуда. Осы баптың санкциясы тауарларды тәркілей отырып, 80 айлық есептік көрсеткішке дейін айыппұл салуды көздейді.

Әділет органдары зияткерлік меншік саласы бағытындағы жұмысын жалғастырады.