ҚазҰУ Заң факультеті: Білім беру саласының үздігі

Қазақстан Республикасының жоғары оқу орындары арасында ерекше орынға ие әл-Фараби атындағы Қазақ ұлттық университетінің (ҚазҰУ) Заң факультеті еліміздегі құқық саласындағы үздік білім беруші орталықтардың бірі болып табылады. Бұл факультет Қазақстанның заң ғылымы мен құқықтық мәдениетін дамытуға айтарлықтай үлес қосып келеді.ҚазҰУ-дың Заң факультеті университетпен бірге құрылып, сол уақыттан бері білім беру саласының көшбасшысы ретінде қалыптасқан. Қазақстанның құқықтық жүйесінің негізін қалаушылардың көпшілігі осы факультеттің түлектері. Олар тек елімізде ғана емес, халықаралық деңгейде де құқықтық мәселелерді шешуде маңызды рөл атқарады. Факультет қазіргі заман талабына сай оқу бағдарламаларын үнемі жаңартып, студенттердің заманауи құқықтық білім алуына жағдай жасайды. Сонымен қатар, халықаралық тәжірибеге бейімделген мамандар дайындауда жоғары стандарттарға сәйкес келеді.

Факультетте бакалавриат, магистратура және докторантура бағдарламалары бойынша оқыту жүргізіледі. Әсіресе, халықаралық құқық, қылмыстық құқық, азаматтық құқық және мемлекеттік басқару салалары бойынша мамандану мүмкіндігі бар.Оқу үрдісі студенттердің теориялық білімін тәжірибемен ұштастыруға бағытталған. Факультет базасында заң клиникасы жұмыс істейді, мұнда студенттер халыққа тегін құқықтық кеңес беріп, тәжірибелік дағдыларын дамыта алады. Сонымен қатар, еліміздің жетекші соттары, прокуратурасы және адвокаттық кеңселерімен тығыз ынтымақтастық орнатылған.

Заң факультеті шетелдік жоғары оқу орындарымен және халықаралық ұйымдармен белсенді жұмыс істейді. Факультет студенттері мен оқытушылары академиялық ұтқырлық бағдарламалары арқылы шетелде білім алып, халықаралық конференцияларға қатысу мүмкіндігіне ие.Еуропа, АҚШ, және Азия елдерінің үздік университеттерімен әріптестік келісімдер жасалған. Бұл студенттердің әлемдік деңгейдегі білім алып, халықаралық тәжірибемен танысуына жол ашады.Факультет түлектері мемлекеттік қызметте, сот жүйесінде, адвокатурада және халықаралық ұйымдарда жоғары лауазымдарды атқаруда. Олардың жетістіктері – факультеттің сапалы білім беру жүйесінің айқын дәлелі.Әл-Фараби атындағы Қазақ ұлттық университетінің Заң факультеті – Қазақстанның құқық саласындағы үздік білім беру мекемесі. Факультет өз түлектерін сапалы біліммен қаруландырып қана қоймай, олардың еліміздің құқықтық мәдениетін нығайтуға бағытталған маман ретінде қалыптасуына ықпал етеді.

Базилова Айгуль Абаевна
Әл-Фараби атындағы ҚазҰУ-нің, қылмыстық құқық қылмыстық іс жүргізу және криминалистика кафедрасының аға оқытушысы
Абилдаев Б.А.
Шалқар Д.Е.
Әл-Фараби атындағы ҚазҰУ, заң факультетінің 4 курс студенттері