ҚазҰУ-да тұрақты даму мақсаттарының жүзеге асырылуы

Қазақстан Республикасының әл-Фараби атындағы Қазақ ұлттық университеті-еліміздің ең беделді және ірі оқу орындарының бірі. Бұл университет тек білім беру саласында ғана емес, сонымен қатар тұрақты даму мақсаттарын жүзеге асыруда да белсенді жұмыс жүргізуде. ҚазҰУ-дың тұрақты даму мақсаттары (ТДМ) бойынша атқарып жатқан жұмыстары еліміздің ғылым мен білім саласында көшбасшы болып, болашақ ұрпақ үшін тұрақты және әділ қоғам құруға бағытталған қадамдар болып табылады. БҰҰ-ның 2030 жылға дейінгі тұрақты даму мақсаттары (ТДМ) — адамзаттың әлеуметтік, экономикалық және экологиялық қажеттіліктерін теңдестіре отырып, болашақ ұрпаққа жақсы өмір сүру жағдайларын қалдыруды көздейді. Бұл мақсаттар 17 негізгі бағыттан тұрады, олардың ішінде кедейлікпен күрес, сапалы білім беру, гендерлік теңдік, таза энергия, экология, әділеттілік және тұрақты экономикалық өсім секілді маңызды мәселелер бар.Оқу ордамыз  осы мақсаттарға сәйкес өзінің білім беру жүйесін жетілдіру, ғылымды дамыту, инновациялық жобалар жасау және қоғамға пайда әкелетін әлеуметтік бағдарламаларды жүзеге асыру жолында белсенді түрде жұмыс істеуде. Қара шаңырақ үшін білім беру сапасын арттыру — маңызды стратегиялық бағыттардың бірі. Университет білім беру жүйесін үнемі жетілдіріп отырады, жаңа оқу бағдарламаларын енгізіп, студенттер мен оқытушылардың білім деңгейін көтеруге бағытталған түрлі шараларды іске асырады. ҚазҰУ әлемдік рейтингтерде үздік орындардан көрініп, студенттерге сапалы білім беру арқылы ТДМ 4 — «Барлық деңгейде сапалы білім беру» мақсатын жүзеге асыруда. Университетте тек жоғары білім беру ғана емес, сонымен қатар өмір бойы білім алу мүмкіндіктері де қамтамасыз етілген. Әрбір студент сапалы білім алып, халықаралық деңгейде бәсекеге қабілетті маман болуға дайындалады. Университет түлектері еліміз үшін жоғары білікті кадрлар болып табылады, олар өз салаларында елдің дамуына үлес қосуда.

ҚазҰУ экологиялық тұрақтылықты қамтамасыз етуге және табиғатты қорғауға ерекше мән береді. Университетте экология және қоршаған ортаны қорғау мәселелеріне көп көңіл бөлінеді. ҚазҰУ-дың экологиялық шараларының ішінде энергия үнемдеу технологияларын енгізу, жасыл технологияларды пайдалану, қалдықтарды қайта өңдеу мен қайта пайдалану, студенттер мен оқытушылар арасында экологиялық білім беру жатады. ҚазҰУ кампусында жасыл алаңдарды көбейту, ағаш отырғызу және энергия тиімді құрылғыларды орнату сияқты көптеген экологиялық бастамалар жүзеге асырылуда. Сонымен қатар, университетте студенттерге экологиялық проблемалар мен тұрақты даму мәселелеріне қатысты жобалар мен зерттеулер жүргізу мүмкіндіктері ұсынылады. ҚазҰУ университеті қоғамдық әділеттілік, құқықтық тәртіп және тиімді институттарды қалыптастыру мақсатында белсенді түрде жұмыс істейді. Университет студенттері мен оқытушылары әлеуметтік жобаларға қатысып, қоғамдағы өзекті мәселелерді шешуге көмектеседі. Бұл бағытта университетте үкіметтік емес ұйымдармен серіктестік орнатылып, құқық қорғаушы ұйымдармен бірге қоғамдық шаралар мен жобалар ұйымдастырады. Оқу ордамыз қоғамның құқықтық мәдениетін арттыру, азаматтардың құқықтарын қорғау және әлеуметтік әділеттілікті сақтау мақсатында көптеген іс-шаралар өткізіп, тұрақты даму мақсаттарына жету жолында үлкен үлес қосып отыр. ҚазҰУ-дың тұрақты даму мақсаттарын жүзеге асырудағы рөлі еліміздің білім беру, ғылыми зерттеу, әлеуметтік теңдік, экология және инновация салаларындағы маңызды жетістіктерін көрсету үшін аса маңызды. Университеттің бұл бағыттағы қызметі тек қана жоғары білім беру мен ғылымның дамуына емес, сонымен қатар қоғамның әлеуметтік және экономикалық тұрақты дамуына да бағытталған. Қара шаңырақтың тұрақты даму мақсаттары бойынша атқарып жатқан жұмыстары еліміздің болашақта тұрақты және әділ қоғам құруға деген ұмтылысын нақты нәтижелермен дәлелдейді.

Сулейменова С.Ж.

Әл-Фараби атындағы ҚазҰУ-дың заң факультеті

азаматтық құқық және азаматтық іс жүргізу,

еңбек құқығы кафедрасының меңгерушісі,

заң ғылымдарының докторы, профессор