Аңыз адам Асанәлі Әшімов дүниеден озды

Қазақ өнері қара жамылды. Еліміздің кино мен театрының аңыз тұлғасы, көрнекті актер және режиссер Асанәлі Әшімов 89 жасқа қараған шағында дүниеден өтті.

Қаралы хабарды мәдениет саласының өкілдері растады. Асанәлі Әшімовтің есімі ондаған жылдар бойы ұлттық өнердің биік деңгейі мен кәсіби шеберліктің символына айналды. Оның шығармашылығы бірнеше ұрпақтың рухани қалыптасуына зор ықпал етті.

 Журналист Диас Нұрақын Facebook әлеуметтік желісіндегі өз парақшасында қаралы хабармен бөлісті:

«Театр және кино тарланы, күллі қазақтың ақсақалы Асанәлі Әшімов мәңгілік мекеніне аттаныпты. Иманы жолдас болсын»

Премьер-министрдің орынбасары – Қазақстан Республикасының Мәдениет және ақпарат министрі Аида Балаева да қайғыға байланысты көңіл білдірді: 

“Ардақты ағайын!

Асанәлі Әшімов 1937 жылы Жамбыл облысында дүниеге келген. Өнер жолын студенттік шағынан бастаған ол кино мен театр сахнасында көптеген есте қаларлық бейнелерді сомдап, көрерменнің ыстық ықыласына бөленді.

Өмірінің әр кезеңінде ол актер ғана емес, режиссер, ұстаз ретінде де ел мәдениетінің дамуына өлшеусіз үлес қосты. Талай жас өнерпазға бағыт-бағдар беріп, ұлттық актерлік мектептің қалыптасуына еңбек сіңірді.

Асанәлі Әшімов — КСРО халық әртісі, Қазақстанның Мемлекеттік сыйлығының иегері, көптеген жоғары марапаттардың иесі. Оның жарқын бейнесі мен бай шығармашылық мұрасы халқымыздың жадында мәңгі сақталады.

Марқұммен қоштасу рәсімі 23 желтоқсан сағат 10:00-де Абай атындағы Қазақ Ұлттық опера және балет театрында өтеді.

Nazarmedia.kz ақпараттық агенттігінің ұжымы марқұмның отбасы мен туған-туыстарына сабыр тілеп, қайғыра көңіл айтады. Марқұмның жатқан жері жайлы болсын! Бақұл болыңыз, аңыз адам!