Efes Art Space Евгения Казакованың «Қадағалау кеңістігі» атты жеке көрмесін ұсынады

Otz Alt галереясында Efes Art Space арт-платформасының бастамасымен Евгения Казакованың «Қадағалау кеңістігі» атты жеке көрмесінің ашылуы өтті.

Көрменің өзегінде суретшінің туған өлкесі Қарағандының пейзаждары, күнделікті өмірдің көзге еленбейтін, бірақ жүрекке жақын көріністері жатыр. Осы қарапайым сәттердің тоғысынан Евгения өзінің ішкі әлемінің картасын жасайды. Ол үшін дала жай ғана көрініс емес, ойдың серігі, жанның үнін қайтарушы, сырлас дос.

Үй, көше, шеберхана — барлығы да кеңістік пен тыныштықтың, самал мен жарықтың ерекше үйлесіміне толы. Евгенияның әрбір сыртқы пейзажы оның ішкі дүниесімен үндесіп жатады: суреттері өзін-өзі танудың, табиғатпен және өз «менімен» үн қатудың нәзік сәттеріне айналады.

Ол жеке тәжірибені жалпыадамзаттық күйге айналдырады. Суретшінің даласына, оның көкжиек пен жарыққа толы кеңістігіне үңілген көрермен өз бойындағы таныс бір сезімді, есте қалған бір сәтті, көңіл күйді еске түсіреді. Осылайша, ортақ естелік пен бақылау аумағы пайда болады, онда пейзаж адамның ішкі әлемінің айнасына айналады.

Көрмеде жиі кездесетін «далалық» бейнесі — суретшінің ішкі бейнесі, әрбір қазақ даласының перзентіне тән символ. Бұл кейіпкер арқылы миф пен күнделікті өмір тоғысып, ішкі сезім көркем бейнеге айналады.

Евгения Казакова әр түрлі материалдармен жұмыс істейді. Кенеп, қағаз, пластик, мата, жібек — әр фактураның өз үні бар, әрбірі ойға жаңа қабат қосады. Пейзаж мұнда фон емес, басты кейіпкер. Түстердің үйлесімі табиғаттың сәттік өзгерістерінен, жарық пен желдің демінен туындайды.

EFES Kazakhstan компаниясының маркетинг жөніндегі директоры Зейнеп Эркан Альп:

«Efes Art Space — бұл тек заманауи өнерді қолдау бастамасы емес, суретші мен қоғам арасындағы тірі диалог алаңы. Біз өнер адамның өзін және айналасын тереңірек тануына мүмкіндік береді деп сенеміз. Евгения Казакованың жобасы дәл осындай кеңістікке айналды — тыныш, шынайы және өте жеке»

«Қадағалау кеңістігі» жобасы — баяулау мен байыптау, ішкі тынысты тыңдау жайлы шақыру. Евгения Казакова жасаған әлемге енген көрермен өз естелігіне оралғандай күй кешеді: даланы бақылау арқылы біз тек табиғатты ғана емес, өзімізді де көреміз.

Мекенжай: Otz Alt, Бәрібаев көшесі, 36
Көрме мерзімі: 2025 жылғы 4–30 қараша
Куратор: Оля Веселова (Efes Art Space)