Қырғызстан: ШЫҰ 25 жылда сенім мен өңірлік ынтымақтастықтың маңызды алаңына айналды

Бішкекте өтетін Шанхай ынтымақтастық ұйымының (ШЫҰ) мерейтойлық саммиті қарсаңында ұйымның 25 жылдық даму жолы мен Орталық Азиядағы рөлі сарапшылар арасында талқыланды.

ШЫҰ-ның 25 жылдығына орай «Біринчи радио» мен CGTN-Русский бірлесіп, ұйымның қалыптасуы мен трансформациясына арналған арнайы шығарылым ұсынды. «25 жыл ШЫҰ: бірлік, сенім, даму» атты бағдарламада сарапшылар ұйымның қазіргі халықаралық жүйедегі орнына және Орталық Азияның геосаяси маңызына тоқталды.

Бағдарламаға Бішкек мемлекеттік университетінің халықаралық қатынастар кафедрасының меңгерушісі, профессор Токтобек Рыскулов, Қырғыз Республикасының Дүниежүзілік саясат институтының директоры Шерадил Бактыгулов, Қырғыз-Қытай зерттеу институты жанындағы ШЫҰ орталығының директоры Ұлықбек Ерешеев және CGTN редакторы Анна Благородова қатысты.

Сарапшылардың пікірінше, ширек ғасыр ішінде ШЫҰ бастапқыдағы «Шанхай бестігі» форматынан кең ауқымды халықаралық ұйымға дейінгі жолдан өтті. Оның күн тәртібі қауіпсіздік мәселелерімен қатар экономикалық байланыстарды, көлік-логистикалық ынтымақтастықты, мәдени-гуманитарлық және басқа да бағыттарды қамти түсті.

Талқылау барысында сарапшылар қазіргі геосаяси жағдайда Орталық Азия елдерінің рөлі артып келе жатқанын атап өтті. Аймақтың Еуропа мен Азияны байланыстыратын көлік дәліздері, энергетикалық және сауда бағыттары тұрғысынан стратегиялық маңызы ШЫҰ аясындағы өзара іс-қимылға жаңа мүмкіндіктер қалыптастырып отыр.

Сонымен бірге бағдарламада ұйымның болашағы, мүше мемлекеттер арасындағы сенімді нығайту және өзгеріп жатқан әлемдік тәртіп жағдайында ШЫҰ-ның тиімділігін арттыру мәселелері сөз болды.

Алдағы саммиттің Қырғызстан астанасы Бішкекте өтуі ұйымның мерейтойлық кезеңіне ерекше мән беріп отыр. Сарапшылардың пікірінше, бұл кездесу ШЫҰ-ның өткен 25 жылдағы нәтижелерін бағалап қана қоймай, оның алдағы даму бағыттарын айқындауға мүмкіндік береді.

Бүгінде ШЫҰ Орталық Азия үшін қауіпсіздік пен экономикалық ынтымақтастықты талқылайтын маңызды көпжақты алаңдардың бірі ретінде қалыптасып отыр.