Туризмдегі рекордты жыл: Рас-эль-Хайма 2025 жылы 1,35 млн турист қабылдады

Рас-эль-Хайма Туризмді дамыту департаменті (Ras Al Khaimah Tourism Development Authority, RAKTDA) эмират үшін тағы бір рекордты нәтижелерді жариялады. 2025 жылы Рас-эль-Хаймаға 1,35 миллион турист келген, бұл алдыңғы жылмен салыстырғанда 6%-ға көп. Ал туризмнен түскен табыс 12%-ға артты.

RAKTDA бас директоры Филлипа Харрисон:

«2025 жыл Рас-эль-Хайма үшін айрықша кезең болды. Эмираттың дамуы тек статистикадан ғана емес, туристік өнімнің мазмұнды түрде байи түсуінен де көрінді: ауқымды іс-шаралар, жаңа қонақ үйлер, жаһандық серіктестіктердің кеңеюі және туристік ағынның тұрақты өсуі. Біз 2030 жылға көз тіге отырып, қонақтар, инвесторлар және жергілікті қауымдастық үшін ұзақ мерзімді құндылық әкелетін туризм моделін қалыптастыруға барынша ниеттіміз»

Бұл жетістіктер іс-шаралар индустриясы, инфрақұрылым, инвестициялар, серіктестіктер және орнықты даму бағыттарындағы табыстардың арқасында мүмкін болды. 2025 жылғы негізгі нәтижелер мыналар:

• ТМД елдері, Ұлыбритания, Үндістан, Қытай, Орталық және Шығыс Еуропа сынды негізгі нарықтарда тұрақты көрсеткіштер. Әсіресе Румыния, Польша, Өзбекстан және Беларусь елдерінен келетін туристер саны айтарлықтай өсті, бұл тікелей әуе рейстерінің кеңеюімен байланысты.
• MICE (іскерлік туризм) және үйлену тойлары сегментінен түскен табыс 25%-ға артты.
• 2025 жылдың тамыз айында Филлипа Харрисонның RAKTDA бас директоры қызметіне тағайындалуы.
• Janu, Four Seasons, Fairmont, Taj және NH Collection секілді жаңа қонақ үй жобаларының іске қосылуы мен жариялануы — бұл 2030 жылға дейін нөмірлік қорды екі есе арттыру мақсатын қолдайды.
• Marjan Beach жағажай курорты мен көпфункциялы RAK Central жобасының дамуы, сондай-ақ Аль-Марджан аралындағы Wynn курорты құрылысының айтарлықтай ілгерілеуі.
• RAK жартылай марафоны, UAE Tour веложарысы, RAK Art Festival, Exotic Wedding Planning Conference және HIGHLANDER хайкинг-челленджі сынды беделді іс-шаралар ауқымының кеңеюі.
• Рас-эль-Хайма халықаралық әуежайында жеке авиацияға арналған VIP-терминал салу жоспарларын қоса алғанда, авиациялық инфрақұрылымның дамуы.
• Virtuoso және Serandipians luxury-саяхат сервистерімен, Huawei медиаплатформасымен, сондай-ақ Қытай мен Сауд Арабиясындағы ірі онлайн-туроператорлармен стратегиялық серіктестіктер.
• Адамға бағдарланған туризмді дамыту: туризм саласы қызметкерлеріне арналған BeRAK мобильді қосымшасының іске қосылуы және салалық жетістіктерді атап өтетін RAK Tourism Excellence Awards сыйлығының тағайындалуы.

Ішкі нарықта туристік ағын 7%-ға өсті. Халықаралық деңгейде Үндістаннан (+14%), Қытайдан (+19%), Ұлыбританиядан (+10%) және Ресейден (+20%) келетін туристер саны артты. Тікелей рейстердің кеңеюі Румыния (+41%), Польша (+22%), Өзбекстан (+19%) және Беларусь (+26%) елдерінен келетін қонақтар санының айтарлықтай өсуіне ықпал етті.

2025 жылы MICE және үйлену тойлары сегментінен түскен табыс 25%-ға ұлғайды. Бұл жоғары бюджетті тойлар, халықаралық конференциялар мен ынталандыру турларының өткізілуімен байланысты. Стратегиялық позициялау мен инфрақұрылымның дамуы Рас-эль-Хайманың іскерлік іс-шаралар мен топтық туризмнің аймақтық орталығы ретіндегі тартымдылығын күшейтуде.

Филлипа Харрисонның RAKTDA бас директоры болып тағайындалуы эмират туризмінің дамуында жаңа тарауды ашты. Tourism Australia ұйымындағы ұлттық туризм стратегиясын басқарудағы мол тәжірибесі Рас-эль-Хайманың трансформациялық өсуге және 2030 жылға қарай 3,5 миллионнан астам турист тарту мақсатына деген ұмтылысын нығайтты.

2025 жылы Рас-эль-Хайма Rove Al Marjan Island және Accor портфеліне кіретін SO/ Ras Al Khaimah қонақ үйлерін ашты. Бұл нысандар жағажай демалысы мен белсенді өмір салтына жаңа мүмкіндіктер қосты.

Janu, Four Seasons, Fairmont, Taj және NH Collection сынды әлемдік luxury-брендтердің мәлімдемелері эмираттың 2030 жылға дейін қонақ үй нөмірлерін екі есе арттыру мақсатын қолдады. Бұл инвестициялар халықаралық қонақжайлылық көшбасшыларының Рас-эль-Хайманың ұзақ мерзімді туристік әлеуетіне деген сенімін көрсетеді.

Wynn Al Marjan Island жобасы — БАӘ-дегі алғашқы интеграцияланған курорт — құрылысындағы маңызды кезеңге жетті: 70 қабатты мұнара 283 метр биіктікке дейін көтерілді. 2027 жылы ашылатын құны 5,1 млрд АҚШ долларын құрайтын бұл курортта 1530 нөмір, 22 мейрамхана мен бар, театр, luxury-бутиктер және яхта айлағы болады. Жоба 9000-нан астам жұмыс орнын құрып, эмираттың жаһандық беделін айтарлықтай арттырады.

2025 жылы БАӘ-дегі ең ірі жағажайлық мастер-жоба — Marjan Beach таныстырылды. Аумағы 85 млн шаршы футты құрайтын бұл жоба 12 000 қонақ үй нөмірі мен 22 000 тұрғын үйді қамтиды, ал аумақтың 30%-ы жасыл аймақтарға бөлінеді.

Сонымен қатар жаңа көпфункциялы іскерлік аудан — RAK Central жобасының құрылысы қарқынды жүріп жатыр. Барлық коммерциялық учаскелер бір жыл ішінде сатылып, инвесторлардың эмират дамуына деген сенімін айқын көрсетті.

2025 жылы Рас-эль-Хайма ірі іс-шараларға толы күнтізбесі арқылы мәдени және спорттық орталық ретіндегі беделін нығайтты. 18-ші Рас-эль-Хайма жартылай марафоны 10 000-нан астам қатысушы мен көрерменді жинап, рекорд орнатты.

UAE Tour веложарысының Джебель-Джейс тау кезеңі жетінші рет өтіп, эмираттың табиғи шыңдарын әлемдік аудиторияға таныстырды. Ал HIGHLANDER жаяу серуендеу челленджі шытырман туризмнің дамуын жалғастырды.

Мәдени және іскерлік салада 13-ші RAK Art Festival 100-ден астам халықаралық және аймақтық суретшіні біріктірді, Exotic Wedding Planning Conference екінші рет өтіп, әлемнің түкпір-түкпірінен ұйымдастырушыларды тартты. Ал алғашқы Халықаралық жылжымайтын мүлік инвестициялары саммиті (IREIS) эмираттың жоғары деңгейлі диалог алаңы ретіндегі беделін арттырды.

Жылдың шарықтау шегі — 15 минуттық Жаңа жылдық шоу болды. 2300 дроннан құралған феникс бейнесі мен алты шақырымдық фейерверк GUINNESS WORLD RECORDS™ рекордын орнатты.

2025 жылы Рас-эль-Хаймаға жаңа әуе бағыттары ашылды. Халықаралық әуежай Сауд Арабиясы, Польша, Румыния, Ресей, Беларусь, Өзбекстан және Чехия елдерінен тікелей рейстерді іске қосты. Сонымен қатар 2027 жылы ашылуы жоспарланған, LEED Gold сертификатына үміткер VIP-терминал салу жоспары жарияланды.

Теңіз бағытында эмират Celestyal Cruises компаниясымен көпжылдық серіктестік орнатып, Араб шығанағындағы премиум-круиздер үшін сұранысқа ие аялдама ретінде позициясын күшейтті.

RAKTDA Қытайдағы Trip.com және Tongcheng, Сауд Арабиясындағы Fursan Travel, Almatar және Wego компанияларымен келісімдерге қол қойды. Сонымен қатар эмират тек шақыру арқылы ғана қолжетімді Virtuoso және Serandipians by Traveller Made желілеріне қосылып, luxury-туризмдегі мәртебесін растады.

2025 жылы туризм саласы қызметкерлеріне арналған BeRAK қосымшасы іске қосылып, алғаш рет RAK Tourism Excellence Awards марапаты табысталды. Ал RAKTDA «Мемлекеттік сектордағы жылдың үздік жұмыс берушісі» атағына ие болып, қонақтарға көрсетілетін сапалы қызметтің негізі — мықты әрі ынталы команда екенін тағы бір мәрте дәлелдеді.