ҚР ҰЭМ-де Қазақстан мен Жапония арасындағы екіжақты экономикалық ынтымақтастықты тереңдету мәселелері талқыланды
![](https://nazarmedia.kz/wp-content/uploads/2023/05/d5e6c827-5060-4363-8174-004b471bb468.jpg)
Бүгін Ұлттық экономика министрі Әлібек Қуантыров Жапонияның Қазақстандағы Төтенше және Өкілетті Елшісі Джун Ямадамен кездесті.
Тараптар экономикалық ынтымақтастықты, оның ішінде сауда-экономикалық байланыстарды нығайту, өндіріс пен энергия үнемдейтін технологияларды бірлесіп дамыту мақсатында Қазақстанға жапондық кәсіпорындарды тарту мәселелерін талқылады. Сондай-ақ, кездесу барысында білім беру және туризмді дамыту туралы сөз қозғалды.
«Жапония – Қазақстанның ең ірі экономикалық серіктестерінің бірі. Қазақстан мен Жапония арасындағы тауар айналымы жыл сайын оң динамика көрсетіп келеді», — деді Ә.Қуантыров.
2022 жылы екі ел арасындағы сауда көлемі $1,9 млрд. құрады, бұл өткен жылдың сәйкес кезеңімен салыстырғанда 71,3%-ға жоғары.
Өз кезегінде, Джун Ямада Жапонияның Қазақстанмен ынтымақтастықты одан әрі дамытуға ниетті екенін растады.
«Жапония мен Қазақстан географиялық жағынан алшақ орналасқанына қарамастан, екі елдің экономикалық ынтымақтастығы ұзақ мерзімді және өзара тиімді сипатқа ие», — деді жапон дипломаты.